) -۪۫۰۰
لقد تم رفع المنتدى على جوجل ازاى تخش من جوجل تكتب منتدى المعاقب هتلاقيه ان شاء الله 
المزاجواتمنى القصه تنال اعجابكم
الجزء الاول
==========
يوم الخميس في الصاله ببيت جدتهم اصواتهم طالعه والاطفال مسوين ربشه والبنات سواليف وناس عند التلفزيون...
ديم ماسكه بيبسي حجم عائلي ومعها الكاسات تصب للقبيله اللي جالسه معها
الهنوف: من الغبي اللي جاب البيبسي قدام البزارين..
طنشتها ديم ولا كنها سمعت لان خالتها الهنوف هذا اسلوبها
نوف: ابي شيبس
ام بدر: شوفي بالمستودع او اسالي امي هي هذا مكانها
البزارين ماصدقوا سمعوا خبر راحوا قبلها للمستودع...
ابتهال: ليتكم قلتوا لي كان مريت البقاله وانا جايه وجبت لكم
العنود: لاشوى انك ماجبتي كان صارت حرب عالميه
ديم: سديم تعالي بوسه عمه
نوف: يما منيره في شيبس ولا خلص؟؟
الجده: ايه حاطته بغرفتي بدولاب الملابس..
العنود: ههههههههه يما الله يهديك احد يحط الاكل مع الملابس
الهنوف ومازالت مستمره: من المتخلف اللي جاب البيبسي حنا ناقصين امراض..
ديم وطفح الكيل معها وردت ببرود: أنا اللي جايبته بس ماني متخلفه ولاغبيه احترمي نفسك
الهنوف بقهر: إلا غبيه ونص
الجده: تعوذو من ابليس وانتم هذا حالكم دايم مناقر..عيب هاذي خالتك يا ديم
ديم: يما ماتشوفينها من الصبح تسب فيني والمشكله هي متقصده عارفه اني أنا اللي جايبته
الهنوف: قليله ادب والله لو اني امك لاعطيك كف على وجهك...
ديم: والله لو انتي امي كان انتحرت
ام بدر بحده: ديم عيب هاذي خالتك
العنود: الهنوف لاتحطين راسك براس بزارين خلاص طنشيها..
ديم: ازعجتنا ببنتها كأن محد عنده عيال غيرها...
ابتهال: اذكروا الله...
نوف توها داخله ومعها كيس الشيبس: اللي يبي شيبس يعطيني ريال
محد عطاها وجه وطالعت فيهم حست الجو متكهرب جلست وطبو فوقها البزارين وبعد ماوزعت عليهم وهي مابقى لها شئ...
ريان: ابي بطاطس
جنى بنت الهنوف: هئ هئ هئ هئ
نوف تكلم ديم بصوت واطئ: وش فيكم؟؟
الجده: ياحبك للشر مافيهم شئ
نوف لقطت وجهها: ديم الشيبس خلص مابقى لنا
ديم بصوت واطئ تستهبل: خذي حق جنى بنت خالتك
نوف: هاهاهاهاهاها.. اللحين الاسبوع اللي راح فجرت الدنيا عشان غيرنا القناه اللي تحبها بنتها اللحين وش تبينها تسوى؟؟..
العنود: وش عندكم تتكلمون بصوت واطئ
ديم: سلامتك..
دخل عليهم خالهم احمد هو يتنحنح: السلام عليكم
طبعا كلهم خواته وعيال وبنات خواته إلا ابتهال مرت ولد اخته حطت جلالها على راسها...
احمد عمره 26 سنه ماتزوج امه مالها ولد غيره لان الباقي بنات.. وسيم موظف في البنك
الكل: وعليكم السلام
ديم: هلاوالله خالي وينك تاخرت؟؟..
نوف: من دخلت وهي تسأل عنك حنا ماملينا عينها
احمد: وش تبين يالمصلحجيه؟؟..
ديم: حرام عليك بس والله اشتقت لك اسبوع ماشفتك
الهنوف: وينك احمد سليمان يسال عنك؟؟..
احمد يلف جهه ديم ويتطنز بهمس: لواحلف يبيني اكتتبله بالاسهم
الهنوف: وش قلت؟؟..
ديم: هههههههه
احمد: تسأل عنه العافيه
نوف: ياويلك اعدامك الليله على يدها
الجده: احمد الله لايهينك جب لنا عشاء خواتك بيروحون وهم ماتعشوا..
ابتهال: مايحتاج عشاء ياخاله أنا والبنات نصلح
ام بدر: الله يصلحهم البنات
العنود: مالقيتو إلا ديم ونوف يصلحون عشاء
احمد: وانا ماجي هالبيت إلا جب عشاء جب غداء جب لبن جب حلويات لجنى.. لدرجه اني مسجل رقم البيت عندي " جب خبز"
البنات: هههههههههههههههههههههههههههههه
ام بدر: أنا وش مسجلني اجل.. الله يستر
احمد: لا انتي امي الثانيه مسجلك " حلى المجالس"
وبدو كل واحد من جهه أنا وش مسميني وانا وش مسميني؟؟.. لمن سحبت ديم الجوال من خالها وبدت تدق الارقام وتعلمهم..
ديم قربت لخالها بهمس: خالي منهو هذا اللي مسجله "النشبه"
سحب احمد الجوال منها عشان ماتطلع باقي الفضايح.. لان النشبه سليمان رجل اخته..
الجوهره اكبر اخوانها عندها خمس عيال وبنت وحده اللي هي ديم عمرها 24 سنه المستوى هذا اخر مستوى لها بالجامعه.
===========================
سراب جالسه بالبيت تقلب القنوات ملت مالقت فيه شئ رفعت التلفون ودقت على بنت جيرانهم ورفيقه دربها ديم...
سراب: الو
ديم: هلاوالله..
سراب: بالبيت؟؟..
ديم: تونا راجعين من بيت جدتي
سراب: اكلمك عالثابت
ديم: تستهبلين انتي كنك ماتعرفين اخواني ياويلي لو رفعت السماعه بعد 11
سراب: يو عندي لك سواليف
ديم: مو اكثر مني فاتك قبل شوي خالتي رفعت ضغطي
سراب:أي وحده؟؟
ديم: العله الهنوف حاطه دوبها دوبي
سراب: ياحليك ياديم مغامرات انتم رايحين الادغال مو بيت جدتك
ديم: ههههههههههههههههه والله ماصبرني عليهم الاخالي احمد ونوف وجدتي
سراب: ياحليلها نوف دخلت الجامعه ولاتوها
ديم: إلا اول سنه بالكليه تخصصها ادب انجليزي
وجلست تحكي لها اللي صار بالتفصيل الممل..
دخل على سراب عبد العزيز اخوها
سراب: ديوم عزيز يبيني اكلمك بعدين
ديم: اوكي.. مع السلامه
سراب: مع السلامه
وبعد ماقفلت عبد العزيز اخوها يسألها: من تكلمين؟؟
سراب: ديم
عبدالعزيز: انتي تاكلين تشربين تنامين وديم معك
سراب: اذكرالله لاتنضلنا أنا بنت وحيده وهي بنت وحيده بين عيال ونشترك بصفات عديده احسها اختي مو صديقتي من يوم حنا صغار مع بعض...
عبدالعزيز: اييييييه لاله إلا الله بيتهم كنها ثانويه عيال واحد داخل واحد طالع
سراب: لاتبالغ الكبير ومتزوج الصغير بيبي مايطلع من البيت
عبدالعزيز: اقول ديم صارت اختك لاتصدقين انهم هم بعد اخوانك
سراب: هاهاهاها... بايخ
عبدالعزيز: اللحين بفهم ليش الصديقات اذا كانت علاقتهم قويه مع بعض يقولون حنا خوات مو صديقات والخوات اذا كانوا قريبين من بعض قالوا حنا صديقات مو خوات وبس...
سراب: صح لانه نادر ماتلاقي خوات مره مع بعض الصديقه عاده تكون اقرب...
عبدالعزيز: والله مدري عنكم
سراب وهي قايمه: عن اذنك.. صايره مؤدبه اليوم
عبدالعزيز: وين رايحه؟؟..
سراب: بروح انام.. تصبح على خير
عبدالعزيز: وانتي من اهله.....
سراب صديقه ديم الروح بالروح وبنفس الوقت تصير بنت جيرانهم يعني عشره هم وياهم ماعندها إلا اخو واحد اسمه عبد العزيز عمره 29 سنه
===============================
ديم بعد ماقفلت من سراب بدلت ملابسها وفتحت دفتر خواطرها... او راح عن بالي اقولكم انها انسانه حالمه شفافه مشاعرها رقيقه تحب الخواطر وتكتب من يوم كانت صغيره..
دق جوالها كان رقم بيت خالتها العنود على طول عرفت ان المتصل نوف...
نوف: هلا ديم
ديم: وش عندك مصيبه جديده؟؟..
نوف: ههههه لا بس اذا دقت امي عليك بعد شوي قولي لها كنت اكلمك
ديم: كل يوم على ذا الحال
نوف: ياشينك...
ديم: مشكلتي طيبه وماقدر ارد لك طلب
نوف: يابعد عمري يلا اخليك مع السلامه
ديم: مع السلامه
كان ثامر اخوها مار من عند الباب واول مانهت المكالمه طب عليها..
ثامر: من كنتي تكلمين؟؟؟
ديم: خير ان شاء الله تدخل علي بدون استاذن
ثامر: ردي على سؤالي
ديم: ماراح اقولك
ثامر: بتعلمني بالطيب ولا؟؟
ديم: كيفي جوالي مو جوالك
ثامر سحب الجوال منها وشاف المكالمات الصادره والوارده ورجع لها جوالها بعد ماشاف رقم بيت خالته...
ديم: سخيف...
ثامر بنظرة حادة: بنات يكلمون اخر الليل ..!!
طنشته وماردت عليه...
ثامر: وبعدين وش الملابس اللي لابستها؟؟..
ديم: الظاهر داخل علي بغرفه النوم اكيد بلبس بيجامه
ثامر عمره 23 تقريبا عله يرفع الضغط دايم مناقر هو وياها يحاول يسيطر ويتحكم بكل امورها مسوي فيها فرد عضلات وهي تحاول قد ماتقدر انها تتحاشاه... تخرج من الثانويه ولاكمل دراسته. ومثل ماقلت لكم قبل عندها خمس اخوان بدر وبعده تركي وبعدين ديم وبعدها ثامر وياسر واخر العنقود ريان ثلاث سنوات...
وبعد ماطلع من عندها وهي مرتفع ضغطها منه مسكت قلمها ومارست هوايتها المحببه كتابه الخواطر وخرجت بهذه الكلمات البسيطه لان النعاس غلبها وماقدرت تقاوم..
أبحث
أبحث عمن يجيد لغة الأحاسيس والمشاعر..
أبحث عمن يخلص في زمن قل فيه المخلصون ويفي في زمن قل فيه الموفون..
أبحث عمن يمسك بيدي ويساندني في هذه الحياة لامن يعينني على الصعود ثم يتركني في المنتصف
أبحث وابحث وفي كل مره اتعثر واسقط ولاجد نفسي الاوقعت في حيره جديده اشد واعمق فما اقسى ان تسير على جسر النجاه بلا دليل
لاتعلم مالذي سيواجهك؟؟
او إلى اين ستصل؟!
وماهي النهايه؟!ّ وكيف ستكون؟
ستجد نفسك في دوامه لاتنتهي.. لامفر ولاملجأ لابد من الصراع
تتصارع موجات في داخلك..
ستبقى تساؤلات مجرد تساؤلات.. بلا اجابه
ساظل اعيش في عالم الحيره.. لكن!! إلى متى؟
لادري هل ساغرق في حيرتي؟! ام ساجد من يمد يده لينقذني!!
ولاظن انني ساجد من ينقذني سوى ذاتي..
نعم ذاتي!!!
======================
الساعه 2 الليل دخلت العنود على بنتها نوف وهي باشد حالات الغضب...
العنود: من كنتي تكلمين؟؟..
نوف: ماكلمت احد
العنود: تلعبين على توني واقفه عند الباب اسمع صوتك
نوف ببرود: يتهيأ لك
العنود: من اليوم ورايح التلفون الثابت بشيله من غرفتك تبين تكلمين انزلي الصاله
نوف: اوف انتم كل شئ عنكم ممنوع جوال وماطلعتولي وسكت دايم أنا اقل من الناس..
العنود: بأيش اقل من الناس بمكالمات اخر الليل
نوف: البنات بالكليه يضحكون علي يقولون معقوله ماعندك جوال؟؟..
العنود: الجوال للحاجه مو للترفيه
نوف: شوفي ديم من يوم دخلت الجامعه طلعت جوال
العنود: ياذي الديم اللي هلكتيني فيها...
نوف: خوات وماعندي والثابت وبتشيلونه عني اجلس اللحالي احضر جن احسن لي...
العنود: جن يركبونك ان شاء الله ولك وجه تتكلمين بعد
نوف: ليش وش سويت ؟؟؟!!!!!!!!!!!!!
العنود: زياده عاللي سويته وتسالين ؟؟.. اذكرك بصوره الشاب اللي شفتها عندك.. ولا بمكالماتك المشبوهه اللي من يوم اقرب لك تقفلين....
نايف طالع الدرج سمع اصوات امه واخته دخل عليهم...
نايف: السلام عليكم
العنود: وعليكم السلام
نايف: وش فيكم؟؟؟..
العنود: ابد بس اختك اختباراتها قربت وماذاكرت وزياده على كذا فاتحه الاستريو ومعليه الصوت اخر الليل....
نايف: نوف انتي صاحيه تعلين الاغاني بهالوقت
ماردت عليه اخته طلع وتركهم....
العنود وهي طالعه: احمدي ربك ان اخوك ماسمع شئ
العنود تصير خاله ديم عيالها هم نايف21 سنه ونوف 19 وريوف 10 سنوات
نوف قلبها ابيض وطيبه لابعد الحدود بس مشكلتها مالقت احد يفهمها بالبيت اختها صغيره وامها علاقتها معها مو ذاك الزود....
==========================
الصباح بكافيتريا الجامعه ديم وبشاير يفطرون طبعا هم مع بعض بنفس القسم
" تعليم خاص" اما صديقتهم الثالثه سراب كانت داخله قسم " رياض اطفال"...
بشاير: اوف امس مانمت الامتاخره
ديم: شكل زوجك مسهرك امس ومسوين ليله رومانسيه
بشاير: أي رومانسيه ياشيخه اللي تعيش مع اهل زوجها ببيت واحد تعرف الرومانسيه
ديم: وسعي صدرك اهم شئ عندك زوج يحبك ويخاف عليك
بشاير: وين سراب تاخرت؟؟!
ديم: هي اليوم عندها موعد اسنان تقول بتشد التقويم وتجي....
بشاير: الله يعينها عندها شد تقويم يعني اليوم ماراح تفطر
ديم: اكيد كالعاده يومين تشرب سوائل
بشاير: جبنا سيره القط جانا ينط
ديم التفتت: هلا والله الطيب عند ذكره وانتي الصادقة
سراب: تحشون فيني!!!!!!!
بشاير: اسال عنك تاخرتي
ديم: كيف اسنانك تعورك؟؟
سراب: يعني مو مره... فاتكم انتم اصلا قهروني وللمره الالف غيروا الدكتور حقي
بشاير: الله يعينك
سراب: يوم دخلت قالوا لي الرسيبشن روحي للدكتور ماجد.. وطول الطريق وانا ادعي ربي يارب مايكون سعودي يوم دخلت عليه قالي بصوت ثقيل هلا والله سراب تفضلي.. عرفت انه سعودي جلست عالكرسي وتحجبت جلس يصلح اسناني وبعد شوي عطاني المرايه وهو ينافخ قالي طالعي شكلك ويوم ناظرت والا الكحل واصل لفمي...
ديم: ههههههههههههههههه بعذره خرعتيه...
سراب: ههههههه المهم اكملكم جاء قالي في سوس بين الاسنان عالجيه وبعدين اشد لك.. قلت يلا ماورانا شئ عالجه اللحين... فجأه صرخ علي هاذي مو شغلتي في ناس متخصصين بالاسنان...
بشاير: ههههههههههههههههه تكفين المره الجايه صوريه لنا
ديم: واذا خلصتي من التصوير جهزي الميموري قبل مايكسر جهازك...
سراب: والله يابنات طلعت من عنده والعبره خانقتني..
ديم+ بشاير:ههههههههههههه
بشاير: تلقينه مايعطي البنات وجه يخاف يتعلقون الشباب عليهم حركات...
ديم: ذكرتيني ثامر اخوى رفع لي ضغطي امس
بشاير: خيييييير وش سوى بعد
سراب: اما اخوك هذا احسه رايح فيها
ديم: لا ماعنده سالفه
بشاير: اما ماعنده سالفه وكل هالفلسفه
ديم: هو بس تحسينه عارف حركات البنات ومحد يلعب عليه...
سراب مقاطعه: وش اللي يخليك متاكده انه مايعرف بنات..
ديم: اذكر مره خليت نوف بنت خالتي تلعب عليه ماعطاها وجه فشلها وقالها لاعاد تتصلين على هالرقم...
بشاير: اخوك ذا صراحه غامض
سراب: قرف يابنات اليوم محاضراتي إلى الساعه 3
ديم: اه بس أنا اللي بعمري اللحين متخرجات وانا لي 6 سنين بالجامعه كل ماتذكر السنه ونص اللي راحت علي وانا احوس وانتقل من قسم لقسم يضيق صدري
بشاير: تكفين عاد اللي تخرجوا استفادوا وظايف مافي
سراب: خلينا كذا احسن لان حنا بمجتمع الوحده اللي تتخرج وهي مابعد تزوجت تصير عانس!!
=======================
وبعد الظهر عبدالعزيز وقف عند الجامعه ينتظر اخته.. جت مسرعه ركبت معه
سراب: ياربي حر عطشانه تكفى وقف عند سوبر ماركت
عبدالعزيز وهو يتلفت: حر!!... اخبر لي هندي يبيع عند هالاشاره ماله داعي سوبر ماركت
سراب: الا سوبر ماركت ابي مجله بعد
عبدالعزيز: وش مجلته؟؟..
سراب: مجله " البوح "
عبدالعزيز: وش عندك فيها هالمجله فيه غيرها احسن منها
سراب: لاهاذي غير
عبدالعزيز: كيف يعني غير؟؟
سراب: اذا عرف السبب بطل العجب... ولاتحرجني اكثر من كذا ماقدر اتكلم
عبدالعزيز: تكفين لاحرجك قايلك خطيبك الليله بيجلس معك
سراب: عزيز الله يخليك وقف ابي المجله
عبدالعزيز: هاذاني وقفت بس ماراح انزل لما تقولين ليش هالمجله بالذات
سراب: اوف بقول وامري لله بس بيني وبينك
عبدالعزيز: حشى اسرار دوليه
سراب: ديم نشروا لها هالاسبوع خاطره.. اول مره تتجرأ وتنشر وهي ماتبي احد من اهلها يعرف
عبدالعزيز: يعني أنا وش شايفتني بهز طولي واروح بيتهم اعلم اخوانها
نزل جاب لها العصيرات والمجله اللي طلبتها ...
===========================
بدرعمره 28 ملتزم متزوج عنده بنت اسمها سديم عمرها سنتين وزوجته ابتهال معلمه في احدى الثانويات لماده الدين...
بدر: لازم اروح لاهلي بكره ماشفتهم هالاسبوع
ابتهال: يوم الخميس ببيت جدتك كلهم يسألون عليك...
بدر: خلاص نروح كلنا بكره...خلصي كل اشغالك عشان لاجينا نروح مايكون وراك شئ
ابتهال: ان شاء الله.. بس عندي محاضره بلقيها بالمصلى على الطالبات عساني اقدر اخلصها عشان اروح..
بدر: واذا ماخلصتي مو مشكله باخذ سديم واروح
ابتهال: ههههههههههه اكيد بتاخذها تبي ديم تنهبل علينا ان ماشافتها
بدر: ياحليلها ديم تذكرين يوم انولدت قالت سموها سديم عشان يصير قريب من اسمي
ابتهال: واللحين ماقصرت معها تحبها وتلعب معها دايم
بدر: الله يديم عليهم... وش موضوع محاضرتك الجايه؟؟..
ابتهال: عن "هجر القران الكريم"...
بدر: والله تمام موضوع حلو
ابتهال: مو حنا في المدرسه حاطين صندوق اقتراحات وشكاوي.. صراحة تفاجأت من بعض الطالبات تقول ما أفتح القرآن إلا للمدرسة!! .. واللي تقول أقرأه من غير استيعاب .. والثانية القرآن ما تعرفه إلا برمضان .. انقهرت انهم عايشين ببلد الحرمين وهذا حالهم ...
بدر: أيه والله .. بس أسهل طريقة لعدم هجر القرآن انه بعد كل فرض يقرا له الواحد صفحتين .. وبكذا يختم القران بشهر ..
ابتهال: ايه هذاني جمّعت مطويات كثيرة .. وابوزعها وان شاء الله تجيب فايد
بدر: الله يجعله في ميزان حسناتك...
وهذا الجزء الثاني عشانك
يلا نبتدأ
===========
نوف جالسه بغرفتها وتفكر بالف فكره عشان تطلع من الوضع اللي هي فيه رفعت السماعه ودقت الرقم تنتظر اجابه من الطرف الاخر.....
نوف: الووووووو
......: هلا والله
نوف: وش اخبارك؟؟..
.......: تمام
نوف: خلاص اليوم أنا طفح الكيل معي وبخربها قبل كم يوم امي دخلت علي بالليل وتهاوشت أنا وياها....احس اني طفشت من حياتي ياهند
هند: ههههههه قايلتلك أنا مافي إلا حل واحد
نوف: خلاص تكفين بكره دبري لي مااجي الاوهومعك
هند: ابشري من عيوني بس تراني مفلسه جيبي فلوس معك
نوف: اوكي... بس لاتنسين
دخلت امها عليها....
نوف: يلا مع السلامه اشوفك بكره
.......
العنود بنظرات شك: من كنتي تكلمين؟؟
نوف: صديقتي هند
العنود بعد ماجلست : يوم الاربعاء معزومه بتروحين معي؟؟
نوف: لامالي خلق
العنود: اجل روحي عند خالتك تلاقين ديم اجلسي معها
نوف وهي قايمه: ان شاء الله...
رفعت العنود السماعه واتصلت على بيت اختها الهنوف
الهنوف: الوووو
العنود: السلام عليكم
الهنوف: هلا وعليكم السلام
العنود: وش اخباركم؟؟.. وش اخبار جنى؟؟..
الهنوف: كلنا بخير انتم وش اخباركم
العنود: الحمدلله.. الهنوف بسألك بتروحين بعد بكره للعزيمه
الهنوف: اكيد بس بنتي مابيها تجلس عند الشغاله الحالها بخليها عند امي
العنود: أنا بخلي نوف تروح بيت الجوهوه جيبي جنى عندها
الهنوف: ليش تودينها عند ديم والله اللحين بنتك تتعلم طواله اللسان منها والحركات اللي مالها داعي...
العنود: ياشيخه ديم ماعليها بس انتي الله يهديك مدري وش فيك عليها
الهنوف: والله هي قليله ادب ماتربت
وبدت الهنوف تسب بديم وتطلع سوالف قديمه... تتوقعون اني ابالغ ومافي خاله تكره بنت اختها كذا؟؟!!... والله موجود خالات من هالنوعيه اللي بيعيش ياما حيشوف...
الهنوف خاله ديم الصغيره عمرها 30 سنه عندها بنت وحده عمرها ثلاث سنين
========================
وبمكان اخر ببيت ابوطلال... بغرفتها توها راجعه من السوق تقيس ملابسها دخلت عليها امها..
ام طلال: وش تسوين؟؟..
بسمه: اجرب الملابس.. التنوره احسها ضيقه ببدلها بكره
ام طلال تفتش الاكياس: هذا حلووو لونه
بسمه: بس الله يستر لايطلع مو مقاسي
ام طلال: البلوفر هذا عفش مو حلو
بسمه: والله؟؟..
ام طلال: ماعجبني
بسمه: ايه لو ديم حبيبه قلبك اللي لابسته كان قلتي يجنن
ام طلال: هههههه ياحبيلها ديم تغارين منها؟؟
بسمه: ايه والله صراحه الواحد يغار
ام طلال: ديم تحبب الواحد فيها
بسمه: شوفي الصراحه ديم حبوبه وقلبها طيب بس مايقهرني إلا حبك الزايد لها...
ام طلال: بنت اخوي الوحيده ولازم احبها
بسمه: الله لنا
ام طلال: بروح بعد شوي بيت اخوي تروحين معي؟؟
بسمه: لازم نروح يمااااااا
ام طلال: ايه خالك من زمان ماشفناه فرصه انه موجود اليوم نسلم عليه
عمه ديم عيالها طلال عمره 25 سنه وبسمه 20 سنه
امهم تحب ديم وتغليها غلا مو طبيعي وبسمه علاقتها فيها عاديه احيانا ضحك وهبال واحيانا حساسيه ورسميه بس هي تغار منها لحب امها الكبير لها...
وبعد ماراحوا بيت ابو بدر استقبلتهم ام بدر وبعد شوي نزلت لهم ديم..
ام طلال بابتسامه: هلاوالله بنور هالبيت
ديم: هلابك ياعمه وين الناس من زمان عنكم
بسمه: نتحراكم انتم تجون بس شكلنا ماوحشناكم
ام بدر: والله يابنيتي انكم عالبال بس الدنيا مشاغل
بسمه: بس ياديم في اختراع اسمه تلفون
ديم: صح في ذي غلبتيني
ام طلال: ديم صابغه شعرك؟؟
ديم بحياء: ايه
ام بدر: ايه تبي تخرب شعرها ويمتلئ شيب وهي توها
ام طلال: بس والله يجنن بسم الله عليك انتي اللي تحلين الصبغه مو هي اللي تحليك
بسمه: يماااااااا نفس لون صبغتي.. مااشوفك مدحتيني يوم صبغت
ام طلال: لاتختلف هي شعرها اطول وطالع احلى عليها... يابخت اللي بيخذها
ديم تحاول تصرف: حتى شعر بسمه ياعمه مره حلووو
دخل عليهم ابوبدر: السلام عليكم
الكل: وعليكم السلام
ابوبدر: وش اخبار ابوطلال وينه ياكافي ماينشاف؟؟.
وراح وقتهم بالسواليف والسؤال عن الحال والبنات بالضحك والتعليقات وام طلال من حبها لديم تتمناها زوجه لولدها ودايما تلمح بهالشئ بس ديم تسوى نفسها مافهمت مو عن شئ هي تحب عمتها وتعزها كثير بس فكره انها تاخذ ولدها شايلتها من بالها....
بعد ماطلعت عمتهم الساعه 10:20 عند التلفزيون...
ابوبدر: حطوا عالاخبار
دق تلفون البيت رد عليه ياسر..
ياسر: يما التلفون خالتي الهنوف تبيك
قامت ام بدر تكلمها بالصالون الثاني ..
ام بدر: الو
الهنوف: هلا والله
ام بدر: هلابك وش اخبارك؟؟
الهنوف: بخير الله يسلمك وانتم كيفكم..
ام بدر: بخير.. امي وش اخبارها؟؟.. لي كم يوم مامريتها
الهنوف: امس كنت عندها ماعليها بخير
ام بدر: عاد انتي خفيفه ماعندك إلا بنيه سهل الروحه والجيه أنا ماالاقي وقت
الهنوف: الله يعين... اقول الجوهره امس ادق عليكم باليل التلفون مشغول ديم وراها ماتكلم من جوالها...
ام بدر: هههههه لامايكلمون اكيد شابكين نت
الهنوف: لايكون تخلون ديم تشبك نت بانصاص الليول ترى النت يخرب البنات
ام بدر: لا الحمدلله ماتشبك الانادرا هذا ثامر اللي مستلم الخط بالليل
الهنوف: اييييييه اهم شئ انتبهي لديم النت مليان بلاوى
ام بدر بملل من نصايح اختها المستمره: الله يصلح الجميع...
وبعد ماقفلت رجعت لعيالها..
ام بدر: الهنوف تسلم عليكم
الكل: الله يسلمك ويسلمها
ياسر: وش اخبار بنتها الدلوعه
ديم: الحمدلله مو أنا الحالي مرتفع ضغطي من بنتها
ام بدر: اليوم ام هشام داقه علي تقول زواج ولدها الشهر الجاي
ابو بدر: ياحليله هشام بيتزوج!!
ياسر: مااحبها ذا الحرمه
تركي: هشام!! والله وكبرنا وصرنا نتزوج
ثامر: كم عمر اللي بياخذها؟؟
ام بدر: وش فيكم تطنزون على صديقتي وولدها
ياسر: يما توه صغير
ام بدر: ارحمنا يالكبير عمرك 15 وتقول هالكلام اجل لو كبرت وش بتقول
ابوبدر: ههههههههه هذا جزاه اللي يغتاب الناس بغيابهم
تركي: بفهم بزر ومزوجينه ليش
ثامر: ههههههه عمره 20 وبيتزوج
ابوبدر: وأنتم اللي بتصرفون عليه
ثامر: لابس يبا المفروض اهله مايعطونه وجه يدرس ويتزوج المفروض ينتظر
تركي: وين بيسكن؟؟
ابوبدر: يقولون ماجرين له شقه
ثامر: قسم بالله مبزره اخر زمن توه مافقس من البيضه وبيتزوج
ياسر: اتخيله بعد سنه شايل ولد معه ويقول للناس هذا ولدي احسهم بيقولون بلا نصب اخوك الصغير
ثامر: هو خط شاربه ولاتوه؟؟
العيال: ههههههههههههههههههههههههه
ابو بدر: عيب عليكم هالكلام
ام بدر: هذا نصيب الولد لاتطنزون
ابوبدر: يالله تصبحون على خير بروح انام
ام بدر: وانتم يلااااا ياسر وراك مدرسه
ريان: وانا ماما بعد...
ديم: امووووت انا عاللي مايعرفون يعبرون
ثامر: أنا بطلع عندي مشوار وراجع
وبعد ماطلع الكل ينام مابقى إلا ديم وتركي...
تركي: امس في احد جاء عندنا البيت
ديم وفهمت تسحيبه: ايه عمتي وبنتها
تركي: اهاااا
ديم: بطلع غرفتي اجهز ملابس بكره
تركي بتردد: نوف وش اخبارها؟؟...
ديم: تمام ماعليها
لحظات صمت بينهم...
ديم بلكاعه: طيب اسأل عن بسمه بعد
تركي: هاهاها دمك مره خفيف
ديم: تصبح على خير بروح انام
تركي عمره 26 سنه تركي عنده شلل اطفال بوحده من رجوله وهالشئ معه من يوم ماانولد بس الحمدلله مايجلس على كرسي ولاشئ يمارس حياته الطبيعيه ورجله يسحبها لمن يجي يمشئ يعني اي واحد بيشوفه يلاحظ ان في عرج او رجله فيها شئ بس الحق يقال الولد مملوح مهندس اعاقته مامنعته من شق طريقه واكمال دراسته ودخول التخصص اللي كان يحلم فيه مع انه احيانا كان يحس باحراج من نظرات الناس له لكنه مع الوقت تعود على هالنظره... يحب نوف بنت خالته حب من طرف واحد وديم مضايقها هالشئ لانها عارفه ان بنت خالتها عايشه بعالم ثاني وكم مره حاولت تلمح لها بحب اخوها لها بس مالقت أي تجاوب منها عشان كذا تحاول ماترد على اسئلته عنها وبنفس الوقت حاز بنفسها هالشئ تتمنى لاخوها وجده تبادله نفس المشاعر..
قبل ما تطفئ النور فتحت دفترها الوردي تسجل فيه لو سطرين قبل ماتنام لانها مستحييل تترك هالعاده والكتابه تمشي بدمها..
احلام وردية..
طقوس جوية..
قد تكون حارة جافة طوال العام..
وقد تكون..
باردة ممطرة في كل فصول الزمان..
اعيش لحظة فرحه .. تتبعها احزان الضحكة
ارى البسمة .. تتبعها احلام موردة
جلّ ما اسمعه .. دعي الأحلام بعيدة
الأحلام لمن يحققها !!
الأحلام لمن يريحها !!
الأحلام ليست لإنسان مثلي .. الأحلام ما تُكتب
الأحلام لن تكون فقط بقلبي .. الأحلام يأتي لها يوم وتتحقق
وانا احلامي كثيرة..
اعدها لاتنتهي ..
انتظر لحظة فرقاها لا استطيع..
تهمس لي .. انا احبك ولن افارقك..
الكل يتركني ايام الرتابة..
الا أنت معي حالك من حالي..
اضحك واجاري نفسي..
واقول وجدت احد يعشقني..
ترد علي بقولها..
حبيبتي لا يمكن ان نفترق..
نحن روحين بجسد..
ابتسم وتتسع الابتسامة..
ارد عليها بقولي
أحبك يا أحلامي احبك ..
حب المغترب لأرض الوطن..
حب البخيل للفلس..
أحبك ..
هل تعلمي الى اي مدى احبك؟؟..
أحبك
حب الحبيب لحبيبه..
وهنا بهذه اللحظة
ضحكت احلامي..
وعلمت ان ما الفراق بيننا محال..
**( غموض انثى )
=============================
الظهر بعد مارجعت من الكليه دخلت غرفتها وقفلت الباب وراها فتحت شنطتها وطلعت جهاز جوال جديد دخلت فيه الشريحه وفي بالها الانتقام من اهلها مثل ماحرموني من الجوال بطريقتي الخاصه قدرت اجيبه.. امي تحسب انها حرمتني من الثابت خلاص ماراح اقدر اكلم الاتحت نظرها..
قعدت تقلب بالقائمه وتسجل بعض الارقام لمن سمعت صوت الباب حطت الجهاز عالسايلانت ودخلته الشنطه...
نوف: ميييييين؟؟
ريوف: أنا افتحي
نوف بعد مافتحت: نعم وش تبين؟؟..
ريوف: ماتبن غدا
نوف: لاشبعانه
ريوف: امي تقول ناديها
نوف: قولي لها بنام اذا قمت بأكل
ريوف: كيفك
ريوف زي ماقلت لكم عمرها عشر سنوات دلوعه امها ترفع الضغط أي شئ تشوفه تركض تقول لامها وكل مصايب نوف من تحت راسها عشان كذا هي حذره مع اختها لابعد الحدود....
===========================
قامت ديم من النوم المغرب ونزلت كانوا اخوانها بالصاله تركي وثامر وياسر وطلال والصغير ريان سلمت وجلست..
تركي: ديم شكلك متغير اليوم
ديم: من أي ناحيه يعني؟؟
تركي: وجهك في شئ؟؟...
ياسر: اكيييييد حاطه مكياج
ديم: يازينك ساكت
ثامر: اييييييه تعالي وش مصلحه بحواجبك؟؟
تركي: حافتهم؟؟!!!
ياسر: وش يعني ؟؟..
ديم: ليش تبوني اصير ملعونه احف حواجبي
ثامر: لاتلعبين علينا واضح انك شايلتهم
ياسر: شكلك كل يوم تشيلين شعرتين تمويه عشان نحس انهم عاديات
تركي: ايه شكلهم مو طبيعي
ديم: خل اروح غرفتي اصرف لي مسوين مكتشفين
تركي: مافي روحه تعالي علميني وش مسويه؟؟..
ثامر: انتي الظاهر ماينفع معك الابدر وزوجته يجلسون معك ويعطونك محاضره...
ديم: ليه شايفني فاسقه ولاخرجت من مله الاسلام
تركي: واللعن شوي بنظرك
ديم: يوووه منكم مشقره حواجبي ارتحتوا
ثامر: نفس الحف تحددين الحاجب
تركي: مدام السالفه كذا أنا اطلع منها من قال لااعلم فقد افتى
سمعوا صوت الباب الخارجي يفتح كان بدر وابتهال ومعهم سديم....
بدر: السلام عليكم
الكل: وعليكم السلام
ديم: هلاااااااا بسدوم.. تعالي بوسه عمه
العيال طلعوا من الصاله عشان مره اخوهم تاخذ راحتها وبعد شوي جاء ابوبدر وام بدر..
المغرب وقت القهوه تجمعوا كلهم..... بعد ماتقهوو....
ديم: يماااااا بروح عند سراب
ام بدر: ماتستحين انتي كل يومين عندها
ابتهال ماسكه جلالها: عادي ياخاله بيتهم قريب...
ثامر: وليه هي ماتجي؟؟
ديم: ماشاء الله حنا بيتنا كله عيال وهي اخو واحد ودايم طالع
ثامر: حتى ولووو....
ابو بدر يقاطعه: كم مره أنا قايلك اذا أنا كنت موجود مالك شغل باختك
تركي: يبا ثامر صادق غلط روحاتها لهم كل وقت
ياسر: حتى أنا اتفشل عند عيال الجيران شكلهم يقولون اختهم كل يوم طالعه
بدر: انتم وش فيكم عليها اذا هي مو مسويه شئ حرام
ديم تبتسم لبدر: هااا وش قلتي يما؟؟
ام بدر: شوفي ابوك وش رايه؟؟
ابوبدر: روحي يابنيتي الله يسهل امرك
ثامر مرتفع ضغطه: يبا هي مو مخربها إلا دلعك لها
ابوبدر: هذا وهي اختك الكبيره اجل لو كانت اصغر منك وش بتسوي
بدر: وبعدين أنت وش حارق رزك لاجاك بنات لاتدلعهم
ياسر: اجل أنت بتدلع سدوم
ديم: ياحبيلها سدووووووم محد يسواها
ريان: وانا بعد ياتيومي
ام بدر: ريان وااااااااااااااااااااااو ياناس أنت قطعه من قلبي
ابتهال: هههه الله يخليه لك ياخاله
راحت ديم غرفتها ولبست بنطلون جينز وتيشيرت ابيض ونزلت وطلعت من الباب الخلفي عشان اخوانها مايشوفون ملابسها ويتفلسفون عليها...
وبعد مادخلت ديم بيت جيرانهم استقبلتها ام عبد العزيز وراحت تنادي لها سراب....
سراب بصوت عالي: مرحبا بالحلوين
ديم: بدري توني برجع لبيتنا
سراب: والله كنت اخذ لي شور انتي ماعلمتيني انك بتجين بدري...
ديم: عادي قلت البساط احمدي ماتوقعت انك بتسوين زحمه وتتروشين
سراب: ههههههه مو عشانك متروشه بس جيرانا من الجهه الثانيه دقوا علينا قالوا في ريحه خايسه طالعه من بيتكم واضطريت اتروش
===========================
يوم الاربعاء الساعه 8 مساء... نوف واختها بالمدخل عند بيت خالتها لابسه عبايتها والطرحه على كتوفها..
ديم: يااختي تاخرتي وينك؟؟
نوف: ريوف ادخلي جوه عند التلفزيون
ريوف تطالع ديم: وين ريان؟؟
ديم: داخل
نوف بعد ماراحت اختها: اسكتي مابغيت اجي العله خالتك محرشه امي عليك كالعاده
ديم: حسبي الله عليها رافعه ضغطي لامرتاحه منها لاهي قريبه ولابعيده
نوف: ماعليك منها هي غيرانه منك..
ديم: نفسي مره اجلس معها من غير هوشه
نوف وهي تطلع شئ من شنطتها: اخيرااااا..
ديم: جوال!!!!!!... اخيرا طلعتي
نوف: الصراحه محد من اهلي يدري مطلعته من وراهم امي كل شئ حارمتني وكل يوم مطلعه قرارات جديده وتراقبني بكل شئ...
ديم: بس هذا مو معناته انك تعرضين نفسك لمشاكل انتي بغنى عنها...
نوف: احبه ياديم احبه مااقدر يمر يوم من غير مااسمع صوته
وبهاللحظات كان تركي طالع من الصاله متجهه للباب الخارجي وطاحت عينه بعين نوف ومن الصدمه وقفوا الثلاثه من غير أي حركه تركي مصدوم ونوف من المفاجئه وديم من خوفها ان اخوها سمع كلامهم..اخيرا استوعبت ديم ودفت نوف للمجلس وطلعت بتشوف اخوها لقته طلع.
نوف: تتوقعين سمعنا
ديم بتوتر: والله مدري... امشي نطلع غرفتي
وبعد ماطلعوا الغرفه وجابت لهم الشغاله العصير...
ديم: نصيحه مني حاولي باهلك يطلعون لك جوال بدال مايدرون انك مطلعه من وراهم وتصير سالفه...
نوف: حاولت معهم الف مره يقولون انسي
ديم: تذكريني أنا اول مادخلت الجامعه اخواني حلفوا اني ماامسك جوال قالوا الجوال يخرب البنت وماله داعي بس حبه حبه لما اقنعتهم.. اصبري الصبر مفتاح الفرج
نوف: أنا وضعي غير وضعك..
ديم: يزيد يدري انك طلعتي؟؟
نوف: ايه
ديم: وش قال؟؟
نوف: بالبدايه عارض وقال اخاف اهلك يصيدونك وبعدها مااسمع صوتك ابدا بس لمن شافني مصره قال انتبهي وخليك حريصه..
ديم: اللحين هو خايف عليك يقولك كذا...
نوف: انتي وش رايك؟؟
ديم: شوفي انتي من كلامك لي دايم عنه احس انه يحبك بس هذا مو كافي.. اذا هو شاريك صدق خليه يجي يخطبك..
نوف: في كذا عقبه بطريقه اول شئ باقي له ترم ويتخرج من الجامعه ثاني شئ اهلي ماراح يرضون أنا متاكده...
سكتت ديم وهي تفكر بحل لبنت خالتها عشان تطلعها من هالمشاكل اللي بتحط نفسها فيها...
=======================
الساعه 9 مساء... ثامر وهو طالع لقى خاله احمد عند الباب...
ثامر: هلاوالله بخالي.. تفضل
وبعد مادخله للصاله...
ثامر: وين الناس من زمان عنك؟؟
احمد: هلابك... وين الناس أنا الخال الحق لي
ثامر: مدام الحق لك وش عندك جاينا
احمد: لايكون بيتك وانا مضيع...
ثامر: عما قريب ان شاء الله
احمد: وش اللي عما قريب بتذبح اهلك وتارثهم
ثامر: لااااا بتزوج
احمد: ههههههههههههههه حلوه
دخلت ديم: هلا هلا هلا البيت منور اثاريك عندنا
احمد: شف الناس اللي تعرف ترحب مو أنت... ديم تعالي شوفي اخوك بيتزوج
ثامر: وش فيك تتطنز أنت شايب وماتزوجت إلا الان تحسب كل الناس مثلك
ديم: هيييييي هييييي أنت حدك خالي هو يشر بس والبنات يتمنونه
احمد: بعد عمري والله ديم
ثامر: والله ان جيت للحق أنا وسيم اكثر منك
احمد وديم: هههههههههههههههههههههههههه
ديم: أنت الدعوه مو وسامه وبس خالي جسم وطول وملح ووظيفه بالبنك وراتب يملئ العين...
ثامر: أنا بس خلوني اتوظف والله لاغطي عليه ونصير نخطب مع بعض ونخير البنات بينا وتتحدوني اذا مااختاروني..
احمد: لا ارتاح من اللحين أنا اذا جوو يخطبون لي ابي وحده نص ديم ماابي مثلها لاني متاكد ماراح احصل...
ديم انحرجت: يؤ يؤ يؤ تركت نوف فوق الحالها بطلع لها
ثامر: يقالك استحت اللحين ترى يلعب عليك
احمد: وين امك؟؟
ثامر: معزومه
احمد: ديم اجل نادي نوف وتعالوا تحت
ديم: وثامر
احمد: يلااااااا توكل كان بتطلع ولاشئ بجلس مع بنات اختي
ديم: اوووووف قويه والله مايعرف له إلا أنت ياخال
ثامر: خليها تنزل بعباتها ونجلس ونفلها اليوم.. مو بالسوق عادي تتمشون بعبايات...
الجزء الاول
==========
يوم الخميس في الصاله ببيت جدتهم اصواتهم طالعه والاطفال مسوين ربشه والبنات سواليف وناس عند التلفزيون...
ديم ماسكه بيبسي حجم عائلي ومعها الكاسات تصب للقبيله اللي جالسه معها
الهنوف: من الغبي اللي جاب البيبسي قدام البزارين..
طنشتها ديم ولا كنها سمعت لان خالتها الهنوف هذا اسلوبها
نوف: ابي شيبس
ام بدر: شوفي بالمستودع او اسالي امي هي هذا مكانها
البزارين ماصدقوا سمعوا خبر راحوا قبلها للمستودع...
ابتهال: ليتكم قلتوا لي كان مريت البقاله وانا جايه وجبت لكم
العنود: لاشوى انك ماجبتي كان صارت حرب عالميه
ديم: سديم تعالي بوسه عمه
نوف: يما منيره في شيبس ولا خلص؟؟
الجده: ايه حاطته بغرفتي بدولاب الملابس..
العنود: ههههههههه يما الله يهديك احد يحط الاكل مع الملابس
الهنوف ومازالت مستمره: من المتخلف اللي جاب البيبسي حنا ناقصين امراض..
ديم وطفح الكيل معها وردت ببرود: أنا اللي جايبته بس ماني متخلفه ولاغبيه احترمي نفسك
الهنوف بقهر: إلا غبيه ونص
الجده: تعوذو من ابليس وانتم هذا حالكم دايم مناقر..عيب هاذي خالتك يا ديم
ديم: يما ماتشوفينها من الصبح تسب فيني والمشكله هي متقصده عارفه اني أنا اللي جايبته
الهنوف: قليله ادب والله لو اني امك لاعطيك كف على وجهك...
ديم: والله لو انتي امي كان انتحرت
ام بدر بحده: ديم عيب هاذي خالتك
العنود: الهنوف لاتحطين راسك براس بزارين خلاص طنشيها..
ديم: ازعجتنا ببنتها كأن محد عنده عيال غيرها...
ابتهال: اذكروا الله...
نوف توها داخله ومعها كيس الشيبس: اللي يبي شيبس يعطيني ريال
محد عطاها وجه وطالعت فيهم حست الجو متكهرب جلست وطبو فوقها البزارين وبعد ماوزعت عليهم وهي مابقى لها شئ...
ريان: ابي بطاطس
جنى بنت الهنوف: هئ هئ هئ هئ
نوف تكلم ديم بصوت واطئ: وش فيكم؟؟
الجده: ياحبك للشر مافيهم شئ
نوف لقطت وجهها: ديم الشيبس خلص مابقى لنا
ديم بصوت واطئ تستهبل: خذي حق جنى بنت خالتك
نوف: هاهاهاهاهاها.. اللحين الاسبوع اللي راح فجرت الدنيا عشان غيرنا القناه اللي تحبها بنتها اللحين وش تبينها تسوى؟؟..
العنود: وش عندكم تتكلمون بصوت واطئ
ديم: سلامتك..
دخل عليهم خالهم احمد هو يتنحنح: السلام عليكم
طبعا كلهم خواته وعيال وبنات خواته إلا ابتهال مرت ولد اخته حطت جلالها على راسها...
احمد عمره 26 سنه ماتزوج امه مالها ولد غيره لان الباقي بنات.. وسيم موظف في البنك
الكل: وعليكم السلام
ديم: هلاوالله خالي وينك تاخرت؟؟..
نوف: من دخلت وهي تسأل عنك حنا ماملينا عينها
احمد: وش تبين يالمصلحجيه؟؟..
ديم: حرام عليك بس والله اشتقت لك اسبوع ماشفتك
الهنوف: وينك احمد سليمان يسال عنك؟؟..
احمد يلف جهه ديم ويتطنز بهمس: لواحلف يبيني اكتتبله بالاسهم
الهنوف: وش قلت؟؟..
ديم: هههههههه
احمد: تسأل عنه العافيه
نوف: ياويلك اعدامك الليله على يدها
الجده: احمد الله لايهينك جب لنا عشاء خواتك بيروحون وهم ماتعشوا..
ابتهال: مايحتاج عشاء ياخاله أنا والبنات نصلح
ام بدر: الله يصلحهم البنات
العنود: مالقيتو إلا ديم ونوف يصلحون عشاء
احمد: وانا ماجي هالبيت إلا جب عشاء جب غداء جب لبن جب حلويات لجنى.. لدرجه اني مسجل رقم البيت عندي " جب خبز"
البنات: هههههههههههههههههههههههههههههه
ام بدر: أنا وش مسجلني اجل.. الله يستر
احمد: لا انتي امي الثانيه مسجلك " حلى المجالس"
وبدو كل واحد من جهه أنا وش مسميني وانا وش مسميني؟؟.. لمن سحبت ديم الجوال من خالها وبدت تدق الارقام وتعلمهم..
ديم قربت لخالها بهمس: خالي منهو هذا اللي مسجله "النشبه"
سحب احمد الجوال منها عشان ماتطلع باقي الفضايح.. لان النشبه سليمان رجل اخته..
الجوهره اكبر اخوانها عندها خمس عيال وبنت وحده اللي هي ديم عمرها 24 سنه المستوى هذا اخر مستوى لها بالجامعه.
===========================
سراب جالسه بالبيت تقلب القنوات ملت مالقت فيه شئ رفعت التلفون ودقت على بنت جيرانهم ورفيقه دربها ديم...
سراب: الو
ديم: هلاوالله..
سراب: بالبيت؟؟..
ديم: تونا راجعين من بيت جدتي
سراب: اكلمك عالثابت
ديم: تستهبلين انتي كنك ماتعرفين اخواني ياويلي لو رفعت السماعه بعد 11
سراب: يو عندي لك سواليف
ديم: مو اكثر مني فاتك قبل شوي خالتي رفعت ضغطي
سراب:أي وحده؟؟
ديم: العله الهنوف حاطه دوبها دوبي
سراب: ياحليك ياديم مغامرات انتم رايحين الادغال مو بيت جدتك
ديم: ههههههههههههههههه والله ماصبرني عليهم الاخالي احمد ونوف وجدتي
سراب: ياحليلها نوف دخلت الجامعه ولاتوها
ديم: إلا اول سنه بالكليه تخصصها ادب انجليزي
وجلست تحكي لها اللي صار بالتفصيل الممل..
دخل على سراب عبد العزيز اخوها
سراب: ديوم عزيز يبيني اكلمك بعدين
ديم: اوكي.. مع السلامه
سراب: مع السلامه
وبعد ماقفلت عبد العزيز اخوها يسألها: من تكلمين؟؟
سراب: ديم
عبدالعزيز: انتي تاكلين تشربين تنامين وديم معك
سراب: اذكرالله لاتنضلنا أنا بنت وحيده وهي بنت وحيده بين عيال ونشترك بصفات عديده احسها اختي مو صديقتي من يوم حنا صغار مع بعض...
عبدالعزيز: اييييييه لاله إلا الله بيتهم كنها ثانويه عيال واحد داخل واحد طالع
سراب: لاتبالغ الكبير ومتزوج الصغير بيبي مايطلع من البيت
عبدالعزيز: اقول ديم صارت اختك لاتصدقين انهم هم بعد اخوانك
سراب: هاهاهاها... بايخ
عبدالعزيز: اللحين بفهم ليش الصديقات اذا كانت علاقتهم قويه مع بعض يقولون حنا خوات مو صديقات والخوات اذا كانوا قريبين من بعض قالوا حنا صديقات مو خوات وبس...
سراب: صح لانه نادر ماتلاقي خوات مره مع بعض الصديقه عاده تكون اقرب...
عبدالعزيز: والله مدري عنكم
سراب وهي قايمه: عن اذنك.. صايره مؤدبه اليوم
عبدالعزيز: وين رايحه؟؟..
سراب: بروح انام.. تصبح على خير
عبدالعزيز: وانتي من اهله.....
سراب صديقه ديم الروح بالروح وبنفس الوقت تصير بنت جيرانهم يعني عشره هم وياهم ماعندها إلا اخو واحد اسمه عبد العزيز عمره 29 سنه
===============================
ديم بعد ماقفلت من سراب بدلت ملابسها وفتحت دفتر خواطرها... او راح عن بالي اقولكم انها انسانه حالمه شفافه مشاعرها رقيقه تحب الخواطر وتكتب من يوم كانت صغيره..
دق جوالها كان رقم بيت خالتها العنود على طول عرفت ان المتصل نوف...
نوف: هلا ديم
ديم: وش عندك مصيبه جديده؟؟..
نوف: ههههه لا بس اذا دقت امي عليك بعد شوي قولي لها كنت اكلمك
ديم: كل يوم على ذا الحال
نوف: ياشينك...
ديم: مشكلتي طيبه وماقدر ارد لك طلب
نوف: يابعد عمري يلا اخليك مع السلامه
ديم: مع السلامه
كان ثامر اخوها مار من عند الباب واول مانهت المكالمه طب عليها..
ثامر: من كنتي تكلمين؟؟؟
ديم: خير ان شاء الله تدخل علي بدون استاذن
ثامر: ردي على سؤالي
ديم: ماراح اقولك
ثامر: بتعلمني بالطيب ولا؟؟
ديم: كيفي جوالي مو جوالك
ثامر سحب الجوال منها وشاف المكالمات الصادره والوارده ورجع لها جوالها بعد ماشاف رقم بيت خالته...
ديم: سخيف...
ثامر بنظرة حادة: بنات يكلمون اخر الليل ..!!
طنشته وماردت عليه...
ثامر: وبعدين وش الملابس اللي لابستها؟؟..
ديم: الظاهر داخل علي بغرفه النوم اكيد بلبس بيجامه
ثامر عمره 23 تقريبا عله يرفع الضغط دايم مناقر هو وياها يحاول يسيطر ويتحكم بكل امورها مسوي فيها فرد عضلات وهي تحاول قد ماتقدر انها تتحاشاه... تخرج من الثانويه ولاكمل دراسته. ومثل ماقلت لكم قبل عندها خمس اخوان بدر وبعده تركي وبعدين ديم وبعدها ثامر وياسر واخر العنقود ريان ثلاث سنوات...
وبعد ماطلع من عندها وهي مرتفع ضغطها منه مسكت قلمها ومارست هوايتها المحببه كتابه الخواطر وخرجت بهذه الكلمات البسيطه لان النعاس غلبها وماقدرت تقاوم..
أبحث
أبحث عمن يجيد لغة الأحاسيس والمشاعر..
أبحث عمن يخلص في زمن قل فيه المخلصون ويفي في زمن قل فيه الموفون..
أبحث عمن يمسك بيدي ويساندني في هذه الحياة لامن يعينني على الصعود ثم يتركني في المنتصف
أبحث وابحث وفي كل مره اتعثر واسقط ولاجد نفسي الاوقعت في حيره جديده اشد واعمق فما اقسى ان تسير على جسر النجاه بلا دليل
لاتعلم مالذي سيواجهك؟؟
او إلى اين ستصل؟!
وماهي النهايه؟!ّ وكيف ستكون؟
ستجد نفسك في دوامه لاتنتهي.. لامفر ولاملجأ لابد من الصراع
تتصارع موجات في داخلك..
ستبقى تساؤلات مجرد تساؤلات.. بلا اجابه
ساظل اعيش في عالم الحيره.. لكن!! إلى متى؟
لادري هل ساغرق في حيرتي؟! ام ساجد من يمد يده لينقذني!!
ولاظن انني ساجد من ينقذني سوى ذاتي..
نعم ذاتي!!!
======================
الساعه 2 الليل دخلت العنود على بنتها نوف وهي باشد حالات الغضب...
العنود: من كنتي تكلمين؟؟..
نوف: ماكلمت احد
العنود: تلعبين على توني واقفه عند الباب اسمع صوتك
نوف ببرود: يتهيأ لك
العنود: من اليوم ورايح التلفون الثابت بشيله من غرفتك تبين تكلمين انزلي الصاله
نوف: اوف انتم كل شئ عنكم ممنوع جوال وماطلعتولي وسكت دايم أنا اقل من الناس..
العنود: بأيش اقل من الناس بمكالمات اخر الليل
نوف: البنات بالكليه يضحكون علي يقولون معقوله ماعندك جوال؟؟..
العنود: الجوال للحاجه مو للترفيه
نوف: شوفي ديم من يوم دخلت الجامعه طلعت جوال
العنود: ياذي الديم اللي هلكتيني فيها...
نوف: خوات وماعندي والثابت وبتشيلونه عني اجلس اللحالي احضر جن احسن لي...
العنود: جن يركبونك ان شاء الله ولك وجه تتكلمين بعد
نوف: ليش وش سويت ؟؟؟!!!!!!!!!!!!!
العنود: زياده عاللي سويته وتسالين ؟؟.. اذكرك بصوره الشاب اللي شفتها عندك.. ولا بمكالماتك المشبوهه اللي من يوم اقرب لك تقفلين....
نايف طالع الدرج سمع اصوات امه واخته دخل عليهم...
نايف: السلام عليكم
العنود: وعليكم السلام
نايف: وش فيكم؟؟؟..
العنود: ابد بس اختك اختباراتها قربت وماذاكرت وزياده على كذا فاتحه الاستريو ومعليه الصوت اخر الليل....
نايف: نوف انتي صاحيه تعلين الاغاني بهالوقت
ماردت عليه اخته طلع وتركهم....
العنود وهي طالعه: احمدي ربك ان اخوك ماسمع شئ
العنود تصير خاله ديم عيالها هم نايف21 سنه ونوف 19 وريوف 10 سنوات
نوف قلبها ابيض وطيبه لابعد الحدود بس مشكلتها مالقت احد يفهمها بالبيت اختها صغيره وامها علاقتها معها مو ذاك الزود....
==========================
الصباح بكافيتريا الجامعه ديم وبشاير يفطرون طبعا هم مع بعض بنفس القسم
" تعليم خاص" اما صديقتهم الثالثه سراب كانت داخله قسم " رياض اطفال"...
بشاير: اوف امس مانمت الامتاخره
ديم: شكل زوجك مسهرك امس ومسوين ليله رومانسيه
بشاير: أي رومانسيه ياشيخه اللي تعيش مع اهل زوجها ببيت واحد تعرف الرومانسيه
ديم: وسعي صدرك اهم شئ عندك زوج يحبك ويخاف عليك
بشاير: وين سراب تاخرت؟؟!
ديم: هي اليوم عندها موعد اسنان تقول بتشد التقويم وتجي....
بشاير: الله يعينها عندها شد تقويم يعني اليوم ماراح تفطر
ديم: اكيد كالعاده يومين تشرب سوائل
بشاير: جبنا سيره القط جانا ينط
ديم التفتت: هلا والله الطيب عند ذكره وانتي الصادقة
سراب: تحشون فيني!!!!!!!
بشاير: اسال عنك تاخرتي
ديم: كيف اسنانك تعورك؟؟
سراب: يعني مو مره... فاتكم انتم اصلا قهروني وللمره الالف غيروا الدكتور حقي
بشاير: الله يعينك
سراب: يوم دخلت قالوا لي الرسيبشن روحي للدكتور ماجد.. وطول الطريق وانا ادعي ربي يارب مايكون سعودي يوم دخلت عليه قالي بصوت ثقيل هلا والله سراب تفضلي.. عرفت انه سعودي جلست عالكرسي وتحجبت جلس يصلح اسناني وبعد شوي عطاني المرايه وهو ينافخ قالي طالعي شكلك ويوم ناظرت والا الكحل واصل لفمي...
ديم: ههههههههههههههههه بعذره خرعتيه...
سراب: ههههههه المهم اكملكم جاء قالي في سوس بين الاسنان عالجيه وبعدين اشد لك.. قلت يلا ماورانا شئ عالجه اللحين... فجأه صرخ علي هاذي مو شغلتي في ناس متخصصين بالاسنان...
بشاير: ههههههههههههههههه تكفين المره الجايه صوريه لنا
ديم: واذا خلصتي من التصوير جهزي الميموري قبل مايكسر جهازك...
سراب: والله يابنات طلعت من عنده والعبره خانقتني..
ديم+ بشاير:ههههههههههههه
بشاير: تلقينه مايعطي البنات وجه يخاف يتعلقون الشباب عليهم حركات...
ديم: ذكرتيني ثامر اخوى رفع لي ضغطي امس
بشاير: خيييييير وش سوى بعد
سراب: اما اخوك هذا احسه رايح فيها
ديم: لا ماعنده سالفه
بشاير: اما ماعنده سالفه وكل هالفلسفه
ديم: هو بس تحسينه عارف حركات البنات ومحد يلعب عليه...
سراب مقاطعه: وش اللي يخليك متاكده انه مايعرف بنات..
ديم: اذكر مره خليت نوف بنت خالتي تلعب عليه ماعطاها وجه فشلها وقالها لاعاد تتصلين على هالرقم...
بشاير: اخوك ذا صراحه غامض
سراب: قرف يابنات اليوم محاضراتي إلى الساعه 3
ديم: اه بس أنا اللي بعمري اللحين متخرجات وانا لي 6 سنين بالجامعه كل ماتذكر السنه ونص اللي راحت علي وانا احوس وانتقل من قسم لقسم يضيق صدري
بشاير: تكفين عاد اللي تخرجوا استفادوا وظايف مافي
سراب: خلينا كذا احسن لان حنا بمجتمع الوحده اللي تتخرج وهي مابعد تزوجت تصير عانس!!
=======================
وبعد الظهر عبدالعزيز وقف عند الجامعه ينتظر اخته.. جت مسرعه ركبت معه
سراب: ياربي حر عطشانه تكفى وقف عند سوبر ماركت
عبدالعزيز وهو يتلفت: حر!!... اخبر لي هندي يبيع عند هالاشاره ماله داعي سوبر ماركت
سراب: الا سوبر ماركت ابي مجله بعد
عبدالعزيز: وش مجلته؟؟..
سراب: مجله " البوح "
عبدالعزيز: وش عندك فيها هالمجله فيه غيرها احسن منها
سراب: لاهاذي غير
عبدالعزيز: كيف يعني غير؟؟
سراب: اذا عرف السبب بطل العجب... ولاتحرجني اكثر من كذا ماقدر اتكلم
عبدالعزيز: تكفين لاحرجك قايلك خطيبك الليله بيجلس معك
سراب: عزيز الله يخليك وقف ابي المجله
عبدالعزيز: هاذاني وقفت بس ماراح انزل لما تقولين ليش هالمجله بالذات
سراب: اوف بقول وامري لله بس بيني وبينك
عبدالعزيز: حشى اسرار دوليه
سراب: ديم نشروا لها هالاسبوع خاطره.. اول مره تتجرأ وتنشر وهي ماتبي احد من اهلها يعرف
عبدالعزيز: يعني أنا وش شايفتني بهز طولي واروح بيتهم اعلم اخوانها
نزل جاب لها العصيرات والمجله اللي طلبتها ...
===========================
بدرعمره 28 ملتزم متزوج عنده بنت اسمها سديم عمرها سنتين وزوجته ابتهال معلمه في احدى الثانويات لماده الدين...
بدر: لازم اروح لاهلي بكره ماشفتهم هالاسبوع
ابتهال: يوم الخميس ببيت جدتك كلهم يسألون عليك...
بدر: خلاص نروح كلنا بكره...خلصي كل اشغالك عشان لاجينا نروح مايكون وراك شئ
ابتهال: ان شاء الله.. بس عندي محاضره بلقيها بالمصلى على الطالبات عساني اقدر اخلصها عشان اروح..
بدر: واذا ماخلصتي مو مشكله باخذ سديم واروح
ابتهال: ههههههههههه اكيد بتاخذها تبي ديم تنهبل علينا ان ماشافتها
بدر: ياحليلها ديم تذكرين يوم انولدت قالت سموها سديم عشان يصير قريب من اسمي
ابتهال: واللحين ماقصرت معها تحبها وتلعب معها دايم
بدر: الله يديم عليهم... وش موضوع محاضرتك الجايه؟؟..
ابتهال: عن "هجر القران الكريم"...
بدر: والله تمام موضوع حلو
ابتهال: مو حنا في المدرسه حاطين صندوق اقتراحات وشكاوي.. صراحة تفاجأت من بعض الطالبات تقول ما أفتح القرآن إلا للمدرسة!! .. واللي تقول أقرأه من غير استيعاب .. والثانية القرآن ما تعرفه إلا برمضان .. انقهرت انهم عايشين ببلد الحرمين وهذا حالهم ...
بدر: أيه والله .. بس أسهل طريقة لعدم هجر القرآن انه بعد كل فرض يقرا له الواحد صفحتين .. وبكذا يختم القران بشهر ..
ابتهال: ايه هذاني جمّعت مطويات كثيرة .. وابوزعها وان شاء الله تجيب فايد
بدر: الله يجعله في ميزان حسناتك...
وهذا الجزء الثاني عشانك
يلا نبتدأ
===========
نوف جالسه بغرفتها وتفكر بالف فكره عشان تطلع من الوضع اللي هي فيه رفعت السماعه ودقت الرقم تنتظر اجابه من الطرف الاخر.....
نوف: الووووووو
......: هلا والله
نوف: وش اخبارك؟؟..
.......: تمام
نوف: خلاص اليوم أنا طفح الكيل معي وبخربها قبل كم يوم امي دخلت علي بالليل وتهاوشت أنا وياها....احس اني طفشت من حياتي ياهند
هند: ههههههه قايلتلك أنا مافي إلا حل واحد
نوف: خلاص تكفين بكره دبري لي مااجي الاوهومعك
هند: ابشري من عيوني بس تراني مفلسه جيبي فلوس معك
نوف: اوكي... بس لاتنسين
دخلت امها عليها....
نوف: يلا مع السلامه اشوفك بكره
.......
العنود بنظرات شك: من كنتي تكلمين؟؟
نوف: صديقتي هند
العنود بعد ماجلست : يوم الاربعاء معزومه بتروحين معي؟؟
نوف: لامالي خلق
العنود: اجل روحي عند خالتك تلاقين ديم اجلسي معها
نوف وهي قايمه: ان شاء الله...
رفعت العنود السماعه واتصلت على بيت اختها الهنوف
الهنوف: الوووو
العنود: السلام عليكم
الهنوف: هلا وعليكم السلام
العنود: وش اخباركم؟؟.. وش اخبار جنى؟؟..
الهنوف: كلنا بخير انتم وش اخباركم
العنود: الحمدلله.. الهنوف بسألك بتروحين بعد بكره للعزيمه
الهنوف: اكيد بس بنتي مابيها تجلس عند الشغاله الحالها بخليها عند امي
العنود: أنا بخلي نوف تروح بيت الجوهوه جيبي جنى عندها
الهنوف: ليش تودينها عند ديم والله اللحين بنتك تتعلم طواله اللسان منها والحركات اللي مالها داعي...
العنود: ياشيخه ديم ماعليها بس انتي الله يهديك مدري وش فيك عليها
الهنوف: والله هي قليله ادب ماتربت
وبدت الهنوف تسب بديم وتطلع سوالف قديمه... تتوقعون اني ابالغ ومافي خاله تكره بنت اختها كذا؟؟!!... والله موجود خالات من هالنوعيه اللي بيعيش ياما حيشوف...
الهنوف خاله ديم الصغيره عمرها 30 سنه عندها بنت وحده عمرها ثلاث سنين
========================
وبمكان اخر ببيت ابوطلال... بغرفتها توها راجعه من السوق تقيس ملابسها دخلت عليها امها..
ام طلال: وش تسوين؟؟..
بسمه: اجرب الملابس.. التنوره احسها ضيقه ببدلها بكره
ام طلال تفتش الاكياس: هذا حلووو لونه
بسمه: بس الله يستر لايطلع مو مقاسي
ام طلال: البلوفر هذا عفش مو حلو
بسمه: والله؟؟..
ام طلال: ماعجبني
بسمه: ايه لو ديم حبيبه قلبك اللي لابسته كان قلتي يجنن
ام طلال: هههههه ياحبيلها ديم تغارين منها؟؟
بسمه: ايه والله صراحه الواحد يغار
ام طلال: ديم تحبب الواحد فيها
بسمه: شوفي الصراحه ديم حبوبه وقلبها طيب بس مايقهرني إلا حبك الزايد لها...
ام طلال: بنت اخوي الوحيده ولازم احبها
بسمه: الله لنا
ام طلال: بروح بعد شوي بيت اخوي تروحين معي؟؟
بسمه: لازم نروح يمااااااا
ام طلال: ايه خالك من زمان ماشفناه فرصه انه موجود اليوم نسلم عليه
عمه ديم عيالها طلال عمره 25 سنه وبسمه 20 سنه
امهم تحب ديم وتغليها غلا مو طبيعي وبسمه علاقتها فيها عاديه احيانا ضحك وهبال واحيانا حساسيه ورسميه بس هي تغار منها لحب امها الكبير لها...
وبعد ماراحوا بيت ابو بدر استقبلتهم ام بدر وبعد شوي نزلت لهم ديم..
ام طلال بابتسامه: هلاوالله بنور هالبيت
ديم: هلابك ياعمه وين الناس من زمان عنكم
بسمه: نتحراكم انتم تجون بس شكلنا ماوحشناكم
ام بدر: والله يابنيتي انكم عالبال بس الدنيا مشاغل
بسمه: بس ياديم في اختراع اسمه تلفون
ديم: صح في ذي غلبتيني
ام طلال: ديم صابغه شعرك؟؟
ديم بحياء: ايه
ام بدر: ايه تبي تخرب شعرها ويمتلئ شيب وهي توها
ام طلال: بس والله يجنن بسم الله عليك انتي اللي تحلين الصبغه مو هي اللي تحليك
بسمه: يماااااااا نفس لون صبغتي.. مااشوفك مدحتيني يوم صبغت
ام طلال: لاتختلف هي شعرها اطول وطالع احلى عليها... يابخت اللي بيخذها
ديم تحاول تصرف: حتى شعر بسمه ياعمه مره حلووو
دخل عليهم ابوبدر: السلام عليكم
الكل: وعليكم السلام
ابوبدر: وش اخبار ابوطلال وينه ياكافي ماينشاف؟؟.
وراح وقتهم بالسواليف والسؤال عن الحال والبنات بالضحك والتعليقات وام طلال من حبها لديم تتمناها زوجه لولدها ودايما تلمح بهالشئ بس ديم تسوى نفسها مافهمت مو عن شئ هي تحب عمتها وتعزها كثير بس فكره انها تاخذ ولدها شايلتها من بالها....
بعد ماطلعت عمتهم الساعه 10:20 عند التلفزيون...
ابوبدر: حطوا عالاخبار
دق تلفون البيت رد عليه ياسر..
ياسر: يما التلفون خالتي الهنوف تبيك
قامت ام بدر تكلمها بالصالون الثاني ..
ام بدر: الو
الهنوف: هلا والله
ام بدر: هلابك وش اخبارك؟؟
الهنوف: بخير الله يسلمك وانتم كيفكم..
ام بدر: بخير.. امي وش اخبارها؟؟.. لي كم يوم مامريتها
الهنوف: امس كنت عندها ماعليها بخير
ام بدر: عاد انتي خفيفه ماعندك إلا بنيه سهل الروحه والجيه أنا ماالاقي وقت
الهنوف: الله يعين... اقول الجوهره امس ادق عليكم باليل التلفون مشغول ديم وراها ماتكلم من جوالها...
ام بدر: هههههه لامايكلمون اكيد شابكين نت
الهنوف: لايكون تخلون ديم تشبك نت بانصاص الليول ترى النت يخرب البنات
ام بدر: لا الحمدلله ماتشبك الانادرا هذا ثامر اللي مستلم الخط بالليل
الهنوف: اييييييه اهم شئ انتبهي لديم النت مليان بلاوى
ام بدر بملل من نصايح اختها المستمره: الله يصلح الجميع...
وبعد ماقفلت رجعت لعيالها..
ام بدر: الهنوف تسلم عليكم
الكل: الله يسلمك ويسلمها
ياسر: وش اخبار بنتها الدلوعه
ديم: الحمدلله مو أنا الحالي مرتفع ضغطي من بنتها
ام بدر: اليوم ام هشام داقه علي تقول زواج ولدها الشهر الجاي
ابو بدر: ياحليله هشام بيتزوج!!
ياسر: مااحبها ذا الحرمه
تركي: هشام!! والله وكبرنا وصرنا نتزوج
ثامر: كم عمر اللي بياخذها؟؟
ام بدر: وش فيكم تطنزون على صديقتي وولدها
ياسر: يما توه صغير
ام بدر: ارحمنا يالكبير عمرك 15 وتقول هالكلام اجل لو كبرت وش بتقول
ابوبدر: ههههههههه هذا جزاه اللي يغتاب الناس بغيابهم
تركي: بفهم بزر ومزوجينه ليش
ثامر: ههههههه عمره 20 وبيتزوج
ابوبدر: وأنتم اللي بتصرفون عليه
ثامر: لابس يبا المفروض اهله مايعطونه وجه يدرس ويتزوج المفروض ينتظر
تركي: وين بيسكن؟؟
ابوبدر: يقولون ماجرين له شقه
ثامر: قسم بالله مبزره اخر زمن توه مافقس من البيضه وبيتزوج
ياسر: اتخيله بعد سنه شايل ولد معه ويقول للناس هذا ولدي احسهم بيقولون بلا نصب اخوك الصغير
ثامر: هو خط شاربه ولاتوه؟؟
العيال: ههههههههههههههههههههههههه
ابو بدر: عيب عليكم هالكلام
ام بدر: هذا نصيب الولد لاتطنزون
ابوبدر: يالله تصبحون على خير بروح انام
ام بدر: وانتم يلااااا ياسر وراك مدرسه
ريان: وانا ماما بعد...
ديم: امووووت انا عاللي مايعرفون يعبرون
ثامر: أنا بطلع عندي مشوار وراجع
وبعد ماطلع الكل ينام مابقى إلا ديم وتركي...
تركي: امس في احد جاء عندنا البيت
ديم وفهمت تسحيبه: ايه عمتي وبنتها
تركي: اهاااا
ديم: بطلع غرفتي اجهز ملابس بكره
تركي بتردد: نوف وش اخبارها؟؟...
ديم: تمام ماعليها
لحظات صمت بينهم...
ديم بلكاعه: طيب اسأل عن بسمه بعد
تركي: هاهاها دمك مره خفيف
ديم: تصبح على خير بروح انام
تركي عمره 26 سنه تركي عنده شلل اطفال بوحده من رجوله وهالشئ معه من يوم ماانولد بس الحمدلله مايجلس على كرسي ولاشئ يمارس حياته الطبيعيه ورجله يسحبها لمن يجي يمشئ يعني اي واحد بيشوفه يلاحظ ان في عرج او رجله فيها شئ بس الحق يقال الولد مملوح مهندس اعاقته مامنعته من شق طريقه واكمال دراسته ودخول التخصص اللي كان يحلم فيه مع انه احيانا كان يحس باحراج من نظرات الناس له لكنه مع الوقت تعود على هالنظره... يحب نوف بنت خالته حب من طرف واحد وديم مضايقها هالشئ لانها عارفه ان بنت خالتها عايشه بعالم ثاني وكم مره حاولت تلمح لها بحب اخوها لها بس مالقت أي تجاوب منها عشان كذا تحاول ماترد على اسئلته عنها وبنفس الوقت حاز بنفسها هالشئ تتمنى لاخوها وجده تبادله نفس المشاعر..
قبل ما تطفئ النور فتحت دفترها الوردي تسجل فيه لو سطرين قبل ماتنام لانها مستحييل تترك هالعاده والكتابه تمشي بدمها..
احلام وردية..
طقوس جوية..
قد تكون حارة جافة طوال العام..
وقد تكون..
باردة ممطرة في كل فصول الزمان..
اعيش لحظة فرحه .. تتبعها احزان الضحكة
ارى البسمة .. تتبعها احلام موردة
جلّ ما اسمعه .. دعي الأحلام بعيدة
الأحلام لمن يحققها !!
الأحلام لمن يريحها !!
الأحلام ليست لإنسان مثلي .. الأحلام ما تُكتب
الأحلام لن تكون فقط بقلبي .. الأحلام يأتي لها يوم وتتحقق
وانا احلامي كثيرة..
اعدها لاتنتهي ..
انتظر لحظة فرقاها لا استطيع..
تهمس لي .. انا احبك ولن افارقك..
الكل يتركني ايام الرتابة..
الا أنت معي حالك من حالي..
اضحك واجاري نفسي..
واقول وجدت احد يعشقني..
ترد علي بقولها..
حبيبتي لا يمكن ان نفترق..
نحن روحين بجسد..
ابتسم وتتسع الابتسامة..
ارد عليها بقولي
أحبك يا أحلامي احبك ..
حب المغترب لأرض الوطن..
حب البخيل للفلس..
أحبك ..
هل تعلمي الى اي مدى احبك؟؟..
أحبك
حب الحبيب لحبيبه..
وهنا بهذه اللحظة
ضحكت احلامي..
وعلمت ان ما الفراق بيننا محال..
**( غموض انثى )
=============================
الظهر بعد مارجعت من الكليه دخلت غرفتها وقفلت الباب وراها فتحت شنطتها وطلعت جهاز جوال جديد دخلت فيه الشريحه وفي بالها الانتقام من اهلها مثل ماحرموني من الجوال بطريقتي الخاصه قدرت اجيبه.. امي تحسب انها حرمتني من الثابت خلاص ماراح اقدر اكلم الاتحت نظرها..
قعدت تقلب بالقائمه وتسجل بعض الارقام لمن سمعت صوت الباب حطت الجهاز عالسايلانت ودخلته الشنطه...
نوف: ميييييين؟؟
ريوف: أنا افتحي
نوف بعد مافتحت: نعم وش تبين؟؟..
ريوف: ماتبن غدا
نوف: لاشبعانه
ريوف: امي تقول ناديها
نوف: قولي لها بنام اذا قمت بأكل
ريوف: كيفك
ريوف زي ماقلت لكم عمرها عشر سنوات دلوعه امها ترفع الضغط أي شئ تشوفه تركض تقول لامها وكل مصايب نوف من تحت راسها عشان كذا هي حذره مع اختها لابعد الحدود....
===========================
قامت ديم من النوم المغرب ونزلت كانوا اخوانها بالصاله تركي وثامر وياسر وطلال والصغير ريان سلمت وجلست..
تركي: ديم شكلك متغير اليوم
ديم: من أي ناحيه يعني؟؟
تركي: وجهك في شئ؟؟...
ياسر: اكيييييد حاطه مكياج
ديم: يازينك ساكت
ثامر: اييييييه تعالي وش مصلحه بحواجبك؟؟
تركي: حافتهم؟؟!!!
ياسر: وش يعني ؟؟..
ديم: ليش تبوني اصير ملعونه احف حواجبي
ثامر: لاتلعبين علينا واضح انك شايلتهم
ياسر: شكلك كل يوم تشيلين شعرتين تمويه عشان نحس انهم عاديات
تركي: ايه شكلهم مو طبيعي
ديم: خل اروح غرفتي اصرف لي مسوين مكتشفين
تركي: مافي روحه تعالي علميني وش مسويه؟؟..
ثامر: انتي الظاهر ماينفع معك الابدر وزوجته يجلسون معك ويعطونك محاضره...
ديم: ليه شايفني فاسقه ولاخرجت من مله الاسلام
تركي: واللعن شوي بنظرك
ديم: يوووه منكم مشقره حواجبي ارتحتوا
ثامر: نفس الحف تحددين الحاجب
تركي: مدام السالفه كذا أنا اطلع منها من قال لااعلم فقد افتى
سمعوا صوت الباب الخارجي يفتح كان بدر وابتهال ومعهم سديم....
بدر: السلام عليكم
الكل: وعليكم السلام
ديم: هلاااااااا بسدوم.. تعالي بوسه عمه
العيال طلعوا من الصاله عشان مره اخوهم تاخذ راحتها وبعد شوي جاء ابوبدر وام بدر..
المغرب وقت القهوه تجمعوا كلهم..... بعد ماتقهوو....
ديم: يماااااا بروح عند سراب
ام بدر: ماتستحين انتي كل يومين عندها
ابتهال ماسكه جلالها: عادي ياخاله بيتهم قريب...
ثامر: وليه هي ماتجي؟؟
ديم: ماشاء الله حنا بيتنا كله عيال وهي اخو واحد ودايم طالع
ثامر: حتى ولووو....
ابو بدر يقاطعه: كم مره أنا قايلك اذا أنا كنت موجود مالك شغل باختك
تركي: يبا ثامر صادق غلط روحاتها لهم كل وقت
ياسر: حتى أنا اتفشل عند عيال الجيران شكلهم يقولون اختهم كل يوم طالعه
بدر: انتم وش فيكم عليها اذا هي مو مسويه شئ حرام
ديم تبتسم لبدر: هااا وش قلتي يما؟؟
ام بدر: شوفي ابوك وش رايه؟؟
ابوبدر: روحي يابنيتي الله يسهل امرك
ثامر مرتفع ضغطه: يبا هي مو مخربها إلا دلعك لها
ابوبدر: هذا وهي اختك الكبيره اجل لو كانت اصغر منك وش بتسوي
بدر: وبعدين أنت وش حارق رزك لاجاك بنات لاتدلعهم
ياسر: اجل أنت بتدلع سدوم
ديم: ياحبيلها سدووووووم محد يسواها
ريان: وانا بعد ياتيومي
ام بدر: ريان وااااااااااااااااااااااو ياناس أنت قطعه من قلبي
ابتهال: هههه الله يخليه لك ياخاله
راحت ديم غرفتها ولبست بنطلون جينز وتيشيرت ابيض ونزلت وطلعت من الباب الخلفي عشان اخوانها مايشوفون ملابسها ويتفلسفون عليها...
وبعد مادخلت ديم بيت جيرانهم استقبلتها ام عبد العزيز وراحت تنادي لها سراب....
سراب بصوت عالي: مرحبا بالحلوين
ديم: بدري توني برجع لبيتنا
سراب: والله كنت اخذ لي شور انتي ماعلمتيني انك بتجين بدري...
ديم: عادي قلت البساط احمدي ماتوقعت انك بتسوين زحمه وتتروشين
سراب: ههههههه مو عشانك متروشه بس جيرانا من الجهه الثانيه دقوا علينا قالوا في ريحه خايسه طالعه من بيتكم واضطريت اتروش
===========================
يوم الاربعاء الساعه 8 مساء... نوف واختها بالمدخل عند بيت خالتها لابسه عبايتها والطرحه على كتوفها..
ديم: يااختي تاخرتي وينك؟؟
نوف: ريوف ادخلي جوه عند التلفزيون
ريوف تطالع ديم: وين ريان؟؟
ديم: داخل
نوف بعد ماراحت اختها: اسكتي مابغيت اجي العله خالتك محرشه امي عليك كالعاده
ديم: حسبي الله عليها رافعه ضغطي لامرتاحه منها لاهي قريبه ولابعيده
نوف: ماعليك منها هي غيرانه منك..
ديم: نفسي مره اجلس معها من غير هوشه
نوف وهي تطلع شئ من شنطتها: اخيرااااا..
ديم: جوال!!!!!!... اخيرا طلعتي
نوف: الصراحه محد من اهلي يدري مطلعته من وراهم امي كل شئ حارمتني وكل يوم مطلعه قرارات جديده وتراقبني بكل شئ...
ديم: بس هذا مو معناته انك تعرضين نفسك لمشاكل انتي بغنى عنها...
نوف: احبه ياديم احبه مااقدر يمر يوم من غير مااسمع صوته
وبهاللحظات كان تركي طالع من الصاله متجهه للباب الخارجي وطاحت عينه بعين نوف ومن الصدمه وقفوا الثلاثه من غير أي حركه تركي مصدوم ونوف من المفاجئه وديم من خوفها ان اخوها سمع كلامهم..اخيرا استوعبت ديم ودفت نوف للمجلس وطلعت بتشوف اخوها لقته طلع.
نوف: تتوقعين سمعنا
ديم بتوتر: والله مدري... امشي نطلع غرفتي
وبعد ماطلعوا الغرفه وجابت لهم الشغاله العصير...
ديم: نصيحه مني حاولي باهلك يطلعون لك جوال بدال مايدرون انك مطلعه من وراهم وتصير سالفه...
نوف: حاولت معهم الف مره يقولون انسي
ديم: تذكريني أنا اول مادخلت الجامعه اخواني حلفوا اني ماامسك جوال قالوا الجوال يخرب البنت وماله داعي بس حبه حبه لما اقنعتهم.. اصبري الصبر مفتاح الفرج
نوف: أنا وضعي غير وضعك..
ديم: يزيد يدري انك طلعتي؟؟
نوف: ايه
ديم: وش قال؟؟
نوف: بالبدايه عارض وقال اخاف اهلك يصيدونك وبعدها مااسمع صوتك ابدا بس لمن شافني مصره قال انتبهي وخليك حريصه..
ديم: اللحين هو خايف عليك يقولك كذا...
نوف: انتي وش رايك؟؟
ديم: شوفي انتي من كلامك لي دايم عنه احس انه يحبك بس هذا مو كافي.. اذا هو شاريك صدق خليه يجي يخطبك..
نوف: في كذا عقبه بطريقه اول شئ باقي له ترم ويتخرج من الجامعه ثاني شئ اهلي ماراح يرضون أنا متاكده...
سكتت ديم وهي تفكر بحل لبنت خالتها عشان تطلعها من هالمشاكل اللي بتحط نفسها فيها...
=======================
الساعه 9 مساء... ثامر وهو طالع لقى خاله احمد عند الباب...
ثامر: هلاوالله بخالي.. تفضل
وبعد مادخله للصاله...
ثامر: وين الناس من زمان عنك؟؟
احمد: هلابك... وين الناس أنا الخال الحق لي
ثامر: مدام الحق لك وش عندك جاينا
احمد: لايكون بيتك وانا مضيع...
ثامر: عما قريب ان شاء الله
احمد: وش اللي عما قريب بتذبح اهلك وتارثهم
ثامر: لااااا بتزوج
احمد: ههههههههههههههه حلوه
دخلت ديم: هلا هلا هلا البيت منور اثاريك عندنا
احمد: شف الناس اللي تعرف ترحب مو أنت... ديم تعالي شوفي اخوك بيتزوج
ثامر: وش فيك تتطنز أنت شايب وماتزوجت إلا الان تحسب كل الناس مثلك
ديم: هيييييي هييييي أنت حدك خالي هو يشر بس والبنات يتمنونه
احمد: بعد عمري والله ديم
ثامر: والله ان جيت للحق أنا وسيم اكثر منك
احمد وديم: هههههههههههههههههههههههههه
ديم: أنت الدعوه مو وسامه وبس خالي جسم وطول وملح ووظيفه بالبنك وراتب يملئ العين...
ثامر: أنا بس خلوني اتوظف والله لاغطي عليه ونصير نخطب مع بعض ونخير البنات بينا وتتحدوني اذا مااختاروني..
احمد: لا ارتاح من اللحين أنا اذا جوو يخطبون لي ابي وحده نص ديم ماابي مثلها لاني متاكد ماراح احصل...
ديم انحرجت: يؤ يؤ يؤ تركت نوف فوق الحالها بطلع لها
ثامر: يقالك استحت اللحين ترى يلعب عليك
احمد: وين امك؟؟
ثامر: معزومه
احمد: ديم اجل نادي نوف وتعالوا تحت
ديم: وثامر
احمد: يلااااااا توكل كان بتطلع ولاشئ بجلس مع بنات اختي
ديم: اوووووف قويه والله مايعرف له إلا أنت ياخال
ثامر: خليها تنزل بعباتها ونجلس ونفلها اليوم.. مو بالسوق عادي تتمشون بعبايات...
